CLICK HERE FOR BLOGGER TEMPLATES AND MYSPACE LAYOUTS »

مرايتي

مرايتي

السبت، 29 نوفمبر 2008

هيا العيال إنقرضت؟؟؟



في منطقة مدرستي موجود جميع فئات المدارس (إبتدائي وإعدادي ومدرستي الثانوي) ففيوم علي غير العادة طبعا ضميري أنبني وقلت لازم أروح المدرسة يعني أحلل الإرشنات وأرضي أهلي المهم وأنا ماشي في الطريق وطبعا مضطر أقوم بدري ومش شايف أدامي ومش طايق أتنفس بطح دماغي سؤال غريب وقلت لنفسي هيا العيال إنقرضت ولا أيه ؟؟؟؟؟ الواحد ماشي مش عارف الواد اللي مأبله دا عيل في إبتدائي ولا في إعدادي ولازمل في الثانوي
أه وربنا يعني كل الناس اللي حوليه لابسه نفس الاستايل كله ضارب الجل المتين ولابس البادي المجسم مع إن معظمهم أبطال كمال أجسام الصومال يعني الحال من بعضه وإتضايقت أوي عشان معرفتش أرد علي نفسي وفي وسط تفكيري حسيت إني إتكعبلت في حاجه المهم لقيت واحد فاتح زوره أد كده وبيقولي شكلك مهيبر عالصبح طشها وأصحا يا كابتن

المهم بصراحة مكنش ليا مزاج أتشاكل المهم قلبتها بهزار ومشيت وبعد شويه لقيت الواد داخل مدرسه إبتدائي ساعتها إتصدمت وقلت والله ما أنا رايح المدرسه ورجعت نمت وأعدت أفكر في اللي حصل ............و أعدت أسائل نفسي هو معتش في عيال ليه ؟؟؟؟؟؟؟؟؟؟
دا أنا مثلا لما كنت في إبتدائي كان ليا أنا وزمايلي لغتنا العياليه وأحلامنا التافهه مثلا إن إحنا مثلا يتسأفلنا في الفصل ولما طلعنا إعدادي أحلامنا إتغيرت بفت مثلا إزاي الواحد يجيب بلاي إستيشن (أحلام تفهه برضوا) ولما دخلنا ثانوي بدأ تفكيرنا يتغير
بس دلوقتي أحلام العيال هيا أحلام الشباب
بجد دي حاجة تقلق كدا العيال دي هتشيل الهم بدري وهتعجز بدري
طب دا بسبب التكنولجيا زي ما بيقولوا ولا أيه
بجد أنا لغاية دلوقتي مش عارف الإجابه

الثلاثاء، 25 نوفمبر 2008


قررت أن أمتلك قلما

في يوم وأنا قاعد علي سريري ضربت في دماغي إني أقرأ كتاب المهم مطولش عليكوا قولوا طول قمت متسحب ورحت عند سرير أختي (أحسن هي المثقفه بتاعت البيت) وسحبت كتاب وبعدين رجعت علي سريري عشان أقرأه ولجل الحظ طلع الكتاب مجموعة قصصية (حسيت إني دخلت في حيطه سد) المهم قعدت أصبر نفسي وأقول لنفسي لازم أطلع راجل وأقرأ ولو حتي صفحه(أحس يعني إني عملت حاجه) وبعد ما قرأت الصفحة الأولي جرت صفحه تانيه لغاية مخلصت الكتاب ودا طبعا يا جماعه علي غير العادة دا أنا نادرا لما بفتح المناهج بتاعتي

وضرب في دماغي زي الصاروخ وقلت ليه مبقاش أنا الكاتب ؟

ليه ميبقاش ليا قلم لونه مختلف يعبر عني فمليت قلمي حبر وبدأت في الكتابه

وعشان كدا عملت المدونه دي

وبدأت أحدد ملامحي في المرايه